Til minne om Jens Moe, Fjord Cadenzas far

Det var med tungt hjarte vi mottok den triste meldinga om at Jens Moe, vår grunnleggjar og store inspirator, gjekk bort den 24. mars. Med djup respekt og stor takksemd vil vi i Fjord Cadenza hedre minnet hans. Frå den spede starten i 1993 såg ikkje Jens berre ein festival, men ein møteplass der musikk, natur og menneske kunne sameinast i Skodje, vår kjære bygd så rik på natur, men så fattig på kulturfasilitetar. Mot alle odds skapte han ein arena der både unge talent og etablerte musikarar frå heile verda kunne bløme og inspirere kvarandre.

Jens sitt engasjement for kultur og samhald manifesterte seg ikkje berre i musikalske framføringar, men også i den dugnadsanda han tende i bygdefolket. Han mobiliserte lokalbefolkningen til å opne heimane sine, og skapte dermed eit unikt og varmt fellesskap. Under Jens sitt visjonære leiarskap vaks Fjord Cadenza til å bli meir enn ein festival; det vart ein vital del av vår kulturelle identitet, og eit symbol på kva som er mogleg når ein arbeider saman mot felles mål.

Det er med stoltheit vi ser tilbake på det fundamentet Jens la, eit fundament som vil halde fram med å bere frukt langt inn i framtida. Hans arv vil leve vidare i kvar tone som spelas under våre festivalar og i kvart hjarte som blir rørt av musikken vi elskar.

Vi er djupt takksame for alt Jens Moe har gjort for Fjord Cadenza og for musikklivet i regionen. Hans visjon og pågangsmot vil aldri bli gløymd. Lat oss alle saman halde fram med å ære Jens sitt minne ved å føre arven hans vidare – med musikken, mennesket og naturen i hjartet.

Takk, Jens, for tonene du gav oss, som framleis syng i hjarta våre.

Hallgeir Øvrebust, styreleiar
Rune Bergmann, kunstnarisk leiar