Foto: Mikhela Greiner

Arrangementet er gratis!

«Eit nytt, stort og varmt talent har meldt sin ankomst», meldte Tor Hammerø i Nettavisen då artist og låtskrivar Marie Løvås gav ut debutalbumet sitt «Natta ser det som ingen ser» i februar 2020. I 2024 er Marie endeleg aktuell med ny musikk igjen.

Singelen «August» som kom ut 10. mai blei godt tatt imot, og har sidan rulla på blant anna NRK P3, NRK P1 Møre og Romsdal og Radio Ålesund. Med ein klår og varm vokal, og tekstar på norsk, syng ho rett i hjartet på lyttaren, med tekststrofer som ofte endar på ein annan måte enn du hadde trudd.

Marie Løvås - vokal, gitar og wurlitzer
Daniela Reyes Holmsen - trekkspel og bass
Torgeir Hovden Standal - gitar

I oktober kjem andrealbumet i sin heilskap, men allereie før utgjevinga har Marie mottatt Norsk Viseforum sitt artiststipend for den nye musikken. I juryens grunngjeving, skrive av Frida Ånnevik, står det at «Det er ein stolt jury som gir årets pris til ei sterk stemme: ei som har funne språket sitt og både syng og skriv med sjøsikkerheit, ro og overtyding. Løvås er ein god historieforteljar som tør å male ut historiene så breie at vi får godt tak i dei, og samtidig leverer ho refrenget akkurat når vi treng det».

Til konserten på Fjord Cadenza vil Marie presentere fleire av dei nye låtane sine i eit spennande trioformat. Med seg har ho Daniela Reyes Holmsen på trekkspel, harmonium og bass, og Torgeir Hovden Standal på gitarar. Tematisk beveger låtane seg rundt det usagte - om ubearbeidde kjensler og erfaringar som ikkje har fått språk, ting ein ikkje tør å seie høgt, og lette over å vere med eit menneske som berre forstår utan at ein treng å seie noko som helst.

KJEKT Å VITE:

💵 Konserten er gratis
🍢 Skrøppatausene sel grillmat fra kl 17:00, så kom sulten!
🎟️ Skal du på festkonserten på Gomerhuset kl 20:00, er dette den perfekte oppladinga
🪑 Førstemann til mølla
♿️ Området er universelt tilgjengeleg